Bakıdakı Rus Evində Beynəlxalq Musiqi Gününə həsr olunmuş konsert keçirilib.

"Multikultural Azərbaycan" xəbər verir ki, Ü.Hacıbəyli adına Bakı Musiqi Akademiyasının "Musiqi nəzəriyyəsi" kafedrasının baş müəllimi, sənətşünaslıq üzrə fəlsəfə doktoru Alyona İnyakina tərəfindən hazırlanan konsert proqramında müxtəlif janrlarda Azərbaycan, rus və xarici bəstəkarların klassik və müasir estrada əsərləri səsləndirilib.

Musiqiçilərin repertuarında bu il yubileyləri qeyd olunan bəstəkarların: F.Əmirovun, R.Hacıyevin, S.Rüstəmovun, C.Rossininin, V.Solovyov-Sedoyın əsərləri yer alıb.

Qeyd edək ki, bu musiqili gecədə premyera baş tutub və Bakı səhnəsində ilk dəfə olaraq L.Muxtarova və A.İnyakina bəstəkar M.Rixterin “Noyabr” pyesini ifa ediblər.

Musiqili gecənin sonunda “RosSotrudniçestvo”nun Azərbaycandakı nümayəndəliyinin rəhbəri İrek Zinnurov tədbirin iştirakçılarına təşəkkürnamələr təqdim edib.