Yəhudilərin işıqlı Xanuki bayramı günlərində Rusiya paytaxtının Sokolniki rayonunda unikal və iri “Moskvanın Dağ Yəhudiləri Birliyi” İcma Mərkəzinin açılışı olub.
Moskva hökuməti icmanın qəyyumlarının - əslən Azərbaycandan olan Qod Nisanovun, Zarax Nisanovun və “STMEQİ” Xeyriyyə Fondunun xahişi ilə dağ yəhudilərinin milli-mədəni mərkəzi üçün bina ayırıb. Mərkəzdə sinaqoq, kitabxana, banket zalı, dərs otaqları yerləşir. Rusiyada bu mərkəz cuhud adlandırılan dağ yəhudilərinin mədəniyyəti, ənənələri və dili ilə tanış edən ilk dini-mədəni mərkəzdir. Burada ənənəvi təhsil proqramları ilə birlikdə yəhudi bayramları qeyd ediləcək, müqəddəs mətnlərin müdrikliyi öyrəniləcək.
“STMEQİ” Beynəlxalq Fondunun prezidenti, bu yaxınlarda Rusiya Prezidenti tərəfindən “Dostluq” ordeni ilə təltif edilmiş Azərbaycan əsilli German Zaxaryayev vurğulayıb ki, mərkəz bütün yəhudilər üçün yaradılıb və hər bir yəhudi burada özü üçün maraqlı və faydalı nəsə tapa bilər.
Təntənəli mərasim qırmızı lentin kəsilməsi ilə açılıb. Bu şərəfli vəzifə mərkəzin mesenatlarına - əslən Azərbaycandan olan Qod Nisanova, Zarax İliyevə və German Zaxaryayevə həvalə edilib. Sonra Qod Nisanov hər bir yəhudilinin evini mühafizə edən, içərisində Tövratdan bir parça olan mezuzanı qapıya bərkidib.
Bayrama toplaşan fəxri qonaqlar və yəhudi icmasının çoxsaylı nümayəndələri bütün otaqları gəzərək, mərkəzə heyran qaldıqlarını bildiriblər. Sonra qonaqlar bayram proqramına və dağ yəhudiləri haqqında təqdimat filminin nümayişinə dəvət ediliblər.
Rusiyanın siyasi və ictimai xadimləri mərkəzin üzvlərini təbrik etməyə gəliblər. Mərasimin rəsmi hissəsində Rusiyanın baş ravvini Berl Lazar, Rusiya Yəhudi İcmaları Federasiyasının prezidenti Aleksandr Boroda, Moskvanın baş ravvini və Avropa Ravvinlər Şurasının sədri Pinxas Qoldşmidt, Rusiya Maarif Nazirliyinin İşlər İdarəsinin departament direktoru, İsrailin müvəqqəti işlər vəkili Yakov Livne, Azərbaycanın Rusiyadakı səfirliyinin birinci katibi Nigar Axundova, Rusiya Federasiyası Prezidentinin Daxili Siyasət İdarəsinin dini qurumlarla qarşılıqlı fəaliyyət departamentinin rəisi Yevgeni Yeryomin çıxış ediblər.
Mərkəzin təntənəli açılışında çoxlu nitq səslənib. Fəxri qonaqlar bildiriblər ki, sadəcə, icma mərkəzinin deyil, yeni formatın – Rusiyada analoqu olmayan çoxfunksiyalı mərkəzin yaradılmasına xeyli qüvvə sərf edilib. Gecə tanınmış dağ yəhudiləri ifaçılarının parlaq çıxışları ilə başa çatıb.
Mərkəz artıq indinin özündə qonaq qəbul edə bilər, lakin yalnız Yeni ildən sonra – dini ayinlərin keçirilməsi üçün hovuzlar hazır olandan sonra tam işləməyə başlayacaq.
