Etnik mənsubiyyətindən asılı olmayaraq bütün şəhidlərimizə və qazilərimizə minnətdarıq!

Vətənə minnət qoymaq lazım deyil! Və Vətəni minnətlə sevməzlər!

Azərbaycan hər birimizin Vətənidir. Etnik mənsubiyyətindən asılı olmayaraq Azərbaycan vətəndaşı olan hər kəs bu dövləti sevməli, qorumalı, yeri gələndə onun uğrunda canından keçməlidir. Heç kim də buna görə Vətənə minnət qoymamalıdır.

Bəzən baxırıq ki, bir şəhidimizin və ya qazimizin etnik kimliyi qabardılır, az qala bütün Azərbaycana minnət qoyulur ki, örnək üçün, urus balası filankəs Vətən üçün şəhid və ya qazi oldu. Sanki bu Vətənin torpaqları yalnız o urus balasının hesabına azad edilib. Halbuki bir elə urus balası qarşılığında minlərlə türk kökənli Azərbaycan vətəndaşı canını fəda edib, torpağı düşməndən azad etmək üçün heç kimə minnət qoymayıb. Demək istədiyimiz odur ki, Vətənin qorunmasında vətəndaşlıq əsasdır. Əgər bu Vətənin övladıyıqsa, onu qorumaq kimi bir təbii borcumuz da var. Ona görə də şəhidlərin etnik kimliyi üzərindən manipulyasiyalar dayandırılmalıdır. Bu, vətəndaşlar arasında ayrıseçkilik toxumları səpir.

Yeri gəlmişkən, belə minnəti Rusiyanın üzərinə qoymaq olar. Çünki Ukraynaya qarşı apardığı əsassız və səbəbsiz müharibədə Rusiya rusları deyil, digər millətləri, özəlliklə də türkləri qabağa verib qırdırır. Misal üçün, əgər o müharibədə bir rus ölürsə, ona nisbətdə aşağı-yuxarı 300 qeyri-rus, əsasən də türk kökənli insan ölür. Azərbaycan isə Qarabağ savaşında belə bir siyasət yürütmədi. Bütün vətəndaşlara eyni məsafədən yanaşıldı, ayrı-seçkilik edilmədi. Ona görə də etnik mənsubiyyəti qabardaraq şəhidlər və qazilər arasında da ayrı-seçkilik etmək lazım deyil. Bir daha deyirik, Azərbaycan etnik mənsubiyyətindən asılı olmayaraq bütün vətəndaşlarımızın eyni dərəcədə Vətənidir və onu qorumaq hər birimizin borcudur.

Sözümün canı odur ki, şəhid və qazilərlə bağlı etnik mənsubiyyət əsas götürülərək aparılan təbliğat ziyanlıdır və dayandırılmalıdır.

Azər Həsrət