“Antiterror əməliyyatlarının başlaması o qədər də gözlənilməz deyildi. Atəşkəs tez-tez pozulurdu, erməni tərəfi açıq şəkildə müharibəyə hazırlaşır, Hindistan, İran, Qərb ölkələri vasitəsilə ordusunu modernləşdirməyə çalışırdı, həm Qarabağda, həm də Ermənistanda revanşistlər meydan sulayır, II Qarabağ savaşının nəticələrinə baxılması tələbləri artırdı və s. Yəni zaman bizi sıxırdı, sərt addımlar atımalı idi”.

"Multikultural Azərbaycan" xəbər verir ki, bu barədə açıqlama ilə siyasi şərhçi Cəmaləddin Quliyev çıxış edib.

C.Quliyev bildirib ki, Azərbaycanın blits kriqini deyəsən nə dostlar, nə düşmənlər proqnozlaşdıra bilməyiblərmiş:

“Hələ də Qərb, İran, ərəb, bəzi rus və hətta türkdilli nəşrlər III Qarabağ savaşı ehtimalından, savaşı davam edəcəyi təqdirdə hansı nəticələrə səbəb ola biləcyindən, Azərbaycanın Ermənistana hücum etmə ehtimalından yazırlar. Müəlliflər də, nəşrlər də yetərincə ciddidir. Demək, antiterror əməliyyatı ermənilərin revanş planlarını pozduğu kimi, Yevlax prinsipləri ilə danışıqlara gedilməsi, Azərbaycan Prezidentinin yeni dinc yanaşı yaşama modeli təklifi də Qafqazda münaqişələri körükləməklə öz maraqlarını həyata keçirmək istəyən neçə-neçə məkr yuvasının planlarını pozdu”.