İran mediası və təəssüf ki, Türkiyənin ifrat dinçi bəzi KİV-ləri Rusiyadan mühacirət edən yəhudilər üçün Azərbaycanda miqrant kampı (qaçqın düşərgəsi) salınması haqda xəbəri şərh edirlər. İran KİV-ləri iddia edir ki, yəhudi icması Azərbaycanda yenidir, sünidir (yəni tarixi kökləri yoxdur), kampın salınmasında məqsəd 100 il əvvəl Fələstində etdikləri kimi, Azərbaycanı da ələ keçirib Qafqazda “yeni yəhudi ocağı” qurmaqdır. Rusiyada yaşayan 600 min yəhudi də bu məqsədlə Azərbaycana köçürüləcəkmiş. Bu yaxınlarda dünyasını dəyişmiş, əslən bakılı, Arye Qut (Rəşid) isə bu planın yerinə yetirilməsində mühüm fiqur, hətta "Prezidentin müşaviri" kimi təqdim edilirdi. Halbuki o, İsraildə daha çox erməni yalanlarına qarşı mübarizə aparan vətənpərvər bir azərbaycanlı, amma adi QHT rəhbəri idi.

Əvvələn, yəhudi icmalarından birini - dağ yəhudilərini bizimlə eyni tarixi, məişəti, mətbəxi, tarixi taleni bölüşdükləri üçün Azərbaycan xalqının bir hissəsi kimi qəbul edirik. Necə ki, Hindistandan gəlmə dünənki qucaratilər zərdüşti olduğu üçün İranda fars kimliyinin içərisində təsəvvür edilir.

Aşkenazi, sefarad və gürcü yəhudiləri isə 19-cu əsrdən bəri bizim vətəndaşlardır, onların indi ABŞ və İsrailə köçənləri də bizim diaspor, bizim lobbidir.

İranın Azərbaycandakı sabiq səfirlərinin fəaliyyəti barədə “O elçilərə zaval yoxdur” başlıqlı yazıda bu iddialara geniş yer vermis, sabiq səfirlərdən Möhsün Pakayinin mənasız iddialara cavabını da təqdim etmişdik. Yenidən təfərrüata varmadan əlavə edək ki, absurdluğu Azərbaycanda hamıya aydın görünən bu iddia ətrafında illərdir təbliğat qurulub; absurdu ciddi şəklə salmaq üçün yüzlərlə yazılar yazılıb, “elmi konfranslar” keçirilib, cümə xütbələrində çıxışlar edilib.

Və birdən-birə “Jerusalim Post”un dərc etdiyi adi zərərsiz xəbərdən bu yalanı yenidən üfürmək üçün ələ nadirən düşən girəvə kimi istifadə etməyə başlayıblar. Xatırladaq ki, sözügedən xəbərdə Rusiyada “Soxnut” təşkilatı bağlandığından (yəhudilərin repatrasiyası ilə məşğul olan humanitar təşkilat) Rusiyaya həmhüdud olan iki ölkədə - Finlandiya və Azərbaycanda miqrant düşərgələri yaradılacağı haqda məlumat verilirdi. Yəni söhbət yalnız Azərbaycanda deyil, həm də Finlandiyada kamp yaradılmasından gedir, məqsədin də hüquqi işlərin asanlaşdırlması olduğu deyilir. Bu, beynəlxalq humanitar hüququn adi praktikasıdır.

İran özü də 1970-90-cı illərdə Əfqanıstan və İraqdan milyonlarla qaçqın qəbul edib. İraqın Kürdüstan vilayətindən gələn şiə kürdlər əsasən vaxtilə azərbaycanlıların çoxluq təşkil etdiyi mərkəz bölgələrində yerləşdirilmiş, gələn miqrantlar sürətlə farslaşdığından həmin əhalinin hesabına etnodemoqrafik balans müəyyən qədər dəyişdirilmişdi. Eyni hal Əfqanıstandan qaçan farsivanilər (farsdilli şiələr) Xorasan və Gülüstanın türkdilli əhali (türkmən və azərbaycanlı əfşarlar) yaşayan bölgələrində, eləcə də İran Bəlucistanında yerləşdiriləndə də təkrarlanmışdı. Görünür, indi ittihamlar səsləndirib xofla dilə gətirilərkən İranın öz yaxın tarixindəki mənhus planlarla bağlı praktikadan çıxış edirlər.

Onu da deyək ki, 1988-89-cu illərdə də Rusiyadan Azərbaycana azsaylı yəhudi qaçqın dalğası gəlmiş, gələnlər sonradan İsrail və ABŞ-a emiqrasiya etmişdilər. Bir az irəli gedilsə, hələ 19-cu əsrin sonları 20-ci əsrin əvvəllərində indiki Ukrayna və Mərkəzi Rusiya ərazilərindəki yəhudi qırğınlarından (“jidovskiye pogromı”) xilas olmaq üçün aşkenazi və sefarad yəhudilərin, hətta gürcü yəhudilərin bir hissəsi Azərbaycana pənah gətirmiş, Bakının mədəni həyatına öz töhfələrini vermis, Cümhuriyyət quruculuğunda da istirak etmişdilər.

Xəbərin alayarımçıq (Finlandiya və “Soxnut”la bağlı məqamlar çıxarılaraq) təqdim edilməsi və qərəzli şərhi Araz çayı yaxınlığında SEPAH-ın keçirdiyi “Qüdrətili İran” adlı növbəti hərbi təlimə haqq qazandırmaq üçün də istifadə olunur. İnqilab Keşikçiləri Korpusunun quru qoşunlarının komandir müavini Əli Əkbər Purcəmşidian deyib ki, “sionist rejim”in bölgədə mövcudluğu ciddi təhlükədir. "Bölgənin sərhədləri dəyişdirilməməlidir.. İran İslam Respublikası iqtisadiyyatının əhəmiyyətli bir hissəsi bu dəhlizdən keçir və təhdidlərə biganə qala bilmərik. Hər keçirilən təlimin bir mesajı var. Biz sülh axtarırıq, əgər laqeyd olsaq, onlar əraziyə etibarsızlıq gətirəcəklər”.

Yalanın bir hissəsi də yəhudi lobbisi və İsraillə əməkdaşlığın tarixi ilə bağlıdır. Təbii ki, icmaların yaranması, iddiaların əksinə olaraq, son 30 ilin nəticəsi olmadığı kimi, o lobbi və diasporla, eləcə də İsrail dövləti ilə əməkdaşlıq da yeni deyil. Hələ mərhum şair Qabilin 1990-cı ildə Azərbaycan SSR-in ilk və son prezidenti Ayaz Mütəllibova açıq məktubunda erməni lobbisinə qarşı yəhudi dostlarımızın dəstəyindən bəhrələnmək tövsiyə olunurdu. Buna bənzər eyhamlı sərki 5 il əvvəl, bir İran heyranının təbirincə desək, “Ərdəbilin əyalət mollasının” (Həsən Amilinin) Şimali Azərbaycan mediasına verdiyi müsahibədə də keçmişdi - “Onlar (yəni dünya yəhudi icması) çox qüdrətlidirlər, istəsələr ki, Qərəbəğ məsələsini xətm eliyələr, eliyəllər, əmma istəmiyləy, axı”. Görürsünüz ki, biz də istəmişik, dostlarımız da dəstək verib. Eninə uzununa çək-çevir etdiyiniz, “NATO gəlir, Turan koridoru qurulur" deyə-deyə xofa düşdüyünüz işlər də yerini alacaq.

Qorxunun əcələ faydası olmaz. Araz boyunca bu qədər qılınc şaqqıldatmağın nə mənası?

Cəmaləddin Quliyev