İmran Hüseynzadə/Multikultural Azərbaycan. “Samur” Ləzgi Milli Mədəni Mərkəzi son illərdə respublikada qəbul olunmuş qanunlara və ölkə Konstitusiyasına əsaslanaraq fəaliyyətinin təkmilləşdirilməsi məqsədi ilə 2019-cu ilin sentyabr ayında nizamnaməsində müvafiq dəyişikliklər apararaq Dövlət qeydiyyatını yeniləyib, vergi orqanlarında qeydiyyata düşüb və bank hesabını açıb. Nizamnamə tələblərinə uyğun olaraq müxtəlif dövlət orqanlarında görüşlər keçirib, Mədəniyyət Nazirliyi, Bakı Beynəlxalq Multikulturalizm Mərkəzi və ictimai təşkilatlarla əlaqələr yaradıb və bir sıra mədəni kütləvi tədbirlər təşkil edib”. Bunu “Multikultural Azərbaycan”a “Samur” Ləzgi Milli Mədəni Mərkəzinin sədri İmran Rzayev təmsil etdiyi qurumun fəaliyyət istiqamətləri barədə danışarkən deyib.
Sədr qeyd edib ki, Mərkəz tərəfindən “Suvar” ansamblının tərkibində Bakı şəhərində 2 yerdə uşaq rəqs məktəbləri açılıb: “Həmin binalarda təmir işləri yerinə yetirilib və ora çoxsaylı uşaqların (gənclərin) cəlb olunması tədbirləri həyata keçirilib. İctimai əlaqələri genişləndirərək gənclərin müxtəlif tədbirlərdə, məsələn, 2018-ci ilin sentyabrında Dağıstan Respublikasında keçirilən “Xəzər 2018” Gənclər Forumunda, 2019-cu ilin may ayında Rusiya Federasiyasının Sankt-Peterburq şəhərində keçirilən Forumda iştirakları təmin olunub. 2017-ci ildə Qusar rayonunda görkəmli alim, mərhum Kərim Kərimovun 100 illik yubiley tədbiri, Bakı Beynəlxalq Multikulturalizm Mərkəzində Avropa Şurasının nümayəndələri ilə görüş keçirilib, may ayında Dağıstan Respublikasında keçirilmiş konfransda iştirak etmişik. Həmçinin, tərəfimizdən 2018-ci ildə bəstəkar Elza İbrahimovanın 80 illik yubiley konsertləri, “Samur” qəzetinin baş redaktoru Sədaqət Kərimovanın yubileyinə həsr olunmuş müəllif gecəsi, şair Bilal Ədilovun 50 illiyinə həsr olunmuş yaradıcılıq gecəsi keçirilib. Ötən ilin 7 may tarixində Ulu öndər Heydər Əliyevin 95 illiyinə və AXC-in 100 illiyinə həsr olunmuş “Suvar” ansamblının böyük konserti baş tutub. Mədəniyyət Nazirliyinin dəstəyi ilə Rəşid Behbudov adına Dövlət Mahnı Teatrında tanınmış şair-jurnalist Müzəffər Məlikməmmədovun 70 illiyinə həsr olunmuş poeziya gecəsi keçirilib. Ləzgi xalqının sevimli şairi XX əsrin “Homer”i adlandırılan Süleyman Stalskinin 150 illiyinə həsr olunmuş yubiley tədbirinin keçirilməsinə hazırlıq işləri başa çatdırılıb və 15 oktyabr tarixində Rəşid Behbudov adına Dövlət Mahnı Teatrında baş tutması razılaşdırılıb”.
İ.Rzayev əlavə edib ki, Mərkəz tərəfindən Qurban bayramında imkansız ailələrə yardım göstərilir: “Gələcəkdə humanitar aksiyaların keçirilməsini planlaşdırırıq. Mərkəz Ləzgi poeziyası ilə məşğul olan yazıçılar və şairlərin xahişlərini nəzərə alaraq Qusar rayonunda Yazıçılar Birliyinin filialının yaradılması məqsədilə müvafiq görüşlər keçirib, bu yaxınlarda məsələnin müsbət həll olunacağına ümid bəsləyir. Mərkəz qarşısında duran məsələləri vaxtaşırı keçirilən İdarə Heyətinin iclaslarında müzakirə edir və qərarlar qəbul edir”.
Qeyd edək ki, “Samur” Ləzgi Milli Mədəni Mərkəzinin məqsədi Azərbaycan Respublikasının Konstitusiyası və qanunvericilik aktları əsasında fəaliyyət qurmaq, ləzgi xalqının dilini, tarixini, mədəniyyətini, adət-ənənələrini, sənətkarlığın və xalq sənətlərinin sərbəst inkişaf etdirilməsi məsələlərinin qorunub saxlanmasına diqqət yetirməkdən ibarətdir. Qurumun 3000 üzvü var. Bundan başqa, “Samur” qəzeti üç dildə - ləzgi, Azərbaycan və rus dilində nəşr olunur.
