İmran Hüseynzadə/Multikultural Azərbaycan. Azərbaycanda bir çox xalqın nümayəndələri yaşayır. Statistikaya görə, bu xalqlar arasında ölkəmizdə məskunlaşan avarlar çoxluq təşkil edir. Avarlar xüsusən Azərbaycanın Balakən, Zaqatala və Qax bölgələrində yaşayırlar. Balakən rayonunun Qabaqçöl qəsəbəsi və onun ətrafında yaşayanların sayı təxminən 25 min nəfər olduğu qeyd edilir. Hətta bəzi qaynaqlarda bu göstəricinin daha da çox olduğu bildirilir. Avarlar öz mədəniyyətini, dilini, məişətini, adət-ənənələrini bu günədək qoruyub saxlayır. Bu ənənələrin qorunub saxlanılmasında “Avar Milli Mədəniyyət Mərkəzi” İctimai Birliyinin də özünəməxsus rolu var.
Qurumun sədri Mahama Bazarov “Multikultural Azərbaycan”a bildirib ki, İctimai Birlik avar milli adət-ənənələrinin, mədəniyyətinin öyrənilməsi və gələcək nəsillərə ötürülməsi istiqamətində fəaliyyət göstərir: “Mədəniyyət mərkəzlərinin yaradılmasında məqsəd budur ki, həmin xalqın milli-mənəvi dəyərləri qorunsun, tanınmış simalar gənclərə örnək göstərilsin, yeni nəsil xeyirli müstəviyə yönləndirilsin. Biz də İB olaraq bacardığımız qədər bu işlərə töhfə vermişik. 2018-ci ilin mart ayında Zaqatala-Balakən rayonlarında köhnə toy musiqilərinin araşdırılması, onların düzgün ifası ilə bağlı tədbir təşkil etmişik. İradə Məlikovanın hazırladığı “Azərbaycanda yaşayan xalqların atalar sözləri və deyimləri” kitabında (Bakı 2016) mənə məxsus Avar atalar sözləri və deyimləri nəşr edilib. Lakin son vaxtlarda fəaliyyətimiz qismən azalıb. Amma buna baxmayaraq 31 Dekabr Dünya Azərbaycanlılarının Həmrəyliyi Günü və Yeni İl bayramı münasibətilə İB üzvləri ilə birlikdə tədbirlər keçirmişik”.
M.Bazarov qeyd edib ki, Balakən rayonunun Qabaqçöl qəsəbəsində öz büdcələri hesabına rəqs məktəbi inşa etdiriblər: "Binanın tikilməsi üçün böyük vəsait sərf etmişik. Bütünlüklə yeni bir bina qurulub. “Qafqaz” rəqs zalı adlanan bu binada həm Azərbaycan, həm də avar rəqsləri öyrədilir. Məktəbimizdə hazırda 2 müəllim fəaliyyət göstərir. Rəqs məktəbinin uşaqları rayon tədbirlərində, müxtəlif festivallarda rəqs nümunələri göstərirlər".
Qeyd edək ki, “Avar Milli Mədəniyyət Mərkəzi” İctimai Birliyi 2007-ci ildə təsis olunub.
