Los-Anceles şəhər şurasının ermənipərəst prezidenti Nuri Martines onun tərəfindən dəfələrlə təkrar edilən irqçi mülahizələrin səs yazısının sosial şəbəkələrə sızmasından sonra istefa verib.

Martines, həmçinin afroamerikalıların ünvanına səsləndirdiyi nalayiq fikirlərinə görə üzr istəyib.

İlk dəfə “Reddit” saytında dərc olunan səs yazıları “Knock LA” qeyri-kommersiya xəbər platforması və “Los Angeles Times” tərəfindən əldə edilib və yayılıb. Söhbətlərdə Martineslə yanaşı, şuranın üzvləri Gil Sedilyo və Kevin de Leon, eləcə də Los-Anceles dairəsinin Əmək Federasiyasının prezidenti Ron Errera iştirak ediblər.

Səs yazısının birində ispan dilində danışan Martines şəhər şurasının üzvü Mayk Boninin (ağdərili amerikalı) qaradərili oğulluğunun “balaca meymuna oxşadığını” deyir. “Onlar döymək əvəzinə, onu balaca ağ uşaq kimi böyüdürlər. Mən onu aparıb küncə qoyub qayıdardım”, - deyə Martines 2017-ci ildə parad zamanı bildirib.

Los-Ancelesin siyasi dairələrində Martines özünün ermənipərəstliyi ilə tanınır. O, şəhər şurasındakı vəzifəsinə seçiləndən bəri erməni lobbi təşkilatların maraqlarına uyğun fəaliyyət göstərib, dəfələrlə, xüsusən də İkinci Qarabağ müharibəsi zamanı Türkiyə və Azərbaycana qarşı mülahizələr yürüdüb./AZƏRTAC