Azərbaycan yüksək milli və dini dözümlülüyü fərqlənən dövlətdir. Həmçinin mütərəqqi tarixi ənənələri və beynəlxalq birlik tərəfindən təsdiq olunan tolerantlıq mühiti ilə seçilən nümunəvi ölkələr sırasındadır. Milli və dini dözümlülük Azərbaycanın dövlət siyasətinin tərkib hissələrindən biridir.

Hazırda ölkəmizdə fəaliyyət göstərən Milli və Dini İcmalar, İctimai Birliklər var. Onlardan biri də Azərbaycan-Avar İctimai Birliyidir. Birliyin sədri Azərbaycanda yaşayan avar xalqının nümayəndəsi Məhəmməd Nooyevdir. 

Qurumun fəaliyyət istiqamətləri barədə “Multikultural Azərbaycan”a danışan M.Nooyev bildirib ki, İctimai Birliyin yaradılmasında məqsəd Azərbaycanda yaşayan avarların Azərbaycanın multikultural mühitinə töhfələrini verməsini təmin etməkdən ibarətdir: “Birliyimizin 4500 üzvü var. Fəaliyyət göstərdiyimiz müddətdə Azərbaycanda məskunlaşan avarlarla birlikdə bir neçə tədbirlər təşkil etmişik. Qeyd edim ki, 2017-ci il may ayında İslam Oyunları 2017 iştirakçıları ilə görüş keçirilib və qaliblər mükafatlandırılıb. 2017-ci il avqust ayında xaricdə və yerli müəssisələrində oxuyan tələbələrlə görüş təşkil edilib və daxili imkan hesabına onlar mükafatlandırılıb. Bundan başqa, bayramlarda da onlarla birlikdə oluruq. 2018-ci ilin mart ayında şəhərdə 100-ə yaxın qadın və kişilərdən ibarət avarlarla Novruz bayramı şənliyi keçirdik. Aprel döyüşləri zamanı həmin hadisələrlə bağlı İB adından bəyanat verdik. Vaxtaşırı mətbuatda xüsusi açıqlamalarla çıxış edirik, Bakı Beynəlxalq Multikulturalizm Mərkəzində Beynəlxalq Tolerantlıq Günü, bayramlar və bu kimi digər əlamətdar günlər münasibətilə tədbirlər keçiririk”.